2016 жылы Қазақстан мемлекеттік аппаратты жаңартуға көшті. Мемлекеттік қызмет істері министрлігінің Солтүстік Қазақстан облысы бойынша департаментінің өкілдері СҚМУ студенттеріне мемлекеттік қызметтің жаңа үлгісі туралы айтып берді.
Қазақстан Республикасы Президенті жарлығымен 2016 жылы Мемлекеттік қызмет істері министрлігі, ал оның құрамында Сыбайлас жемқорлыққа қарсы іс-қимыл ұлттық бюросы құрылды. Бұл - мемлекеттік қызметтің жаңа үлгісін құру жолында жасалған алғашқы қадам.
"Мемлекеттік қызметтің жаңа үлгісі - Қазақстан кәсіби мемлекеттік аппарат қалыптастыру жолында ұмтылып жатқан идеалды үлгіні тәуелсіздіктің 25 жылы ішінде реформалау үдерісі. Мемлекетіміздің барлық стратегиялық құжаттары осы мақсаттарға қол жеткізуге бағытталған. Осы жылы қабылданған жаңа заңдар да кәсіби басқарма қалыптастыру үдерісіне көмегін тигізеді", - дейді Мемлекеттік қызмет істері министрлігінің СҚО бойынша департаментінің Сыбайлас жемқорлықтың алдын алу басқармасының бас маманы Рүстем Байжанов.
Мемлекеттік аппараттың жаңа үлгісін құруда басты буыны жоғары білікті әрі тиімді кадрлар болмақ. Қазақстанда мемлекет қызметкерлерінің мансаптық сатыда жоғарылауы байқау негізінде және меритократия ұстанымы бойынша жүргізіледі. Мемлекеттік қызмет істері министрлігінің СҚО бойынша департаментінің Мемлекеттік қызмет басқармасының бас маманы Гүлнәра Сәрсембаева: "Мемлекеттік қызметтің жаңа үлгісі келесі механизмдердің енгізілуіне байланысты іске асырылады: ішкі байқауларды енгізу жолымен мансаптық саты бойынша жоғарылау, заңнаманы білу деңгейіне тестілеу, жалпы байқау өткізу, бірінші рет түсушілерге сынақ мерзімін орнату, кадрлық резервті тарату, аудару институтын шектеу, ротациялау институтын енгізу", - деп мемлекеттік аппарат жүйесіндегі жаңалық туралы айтып өтті.
Бұдан былай мемлекеттік қызметке жұмысқа орналастыру үш кезеңді іріктеу негізінде азаматтар арасында байқау өткізу арқылы жүргізіледі. Бұл - заңнаманы білу деңгейіне тестілеу, мемлекеттік органда әңгімелесу және жеке қасиеттерді бағалауға тестілеу.
