Жоғары оқу орнымызда 5 институционалдық реформаны жүзеге асыру бойынша "100 нақты қадам" ұлт жоспары талқыланды. Университеттің профессорлық-оқытушы құрамы "Нұр Отан" партиясы мен СҚО Мемлекеттік қызмет істері департаментінің өкілдерімен Елбасының стратегиялық құжатын қарастырды. Дөңгелек үстел отырысына облысымыздың қоғамдық қайраткерлері де қатысты.
Тәрбие жұмысы жөніндегі проректор Мұқарам Тайжанова Ұлт жоспарын жүзеге асыру шеңберінде жоғары оқу орны алдына қойылған міндеттер туралы айтып берді. Ең алдымен, білікті мамандар даярлау. Мұқарам Мұрзатқызының пікірінше, еліміздің гүлденуі үшін мықты кадрлар қажет. Сондай-ақ, біздің университет - үш тілді меңгерген түлектерді даярлауға жауапты. Оқу ордамызда көптілді оқыту жүйесі бойынша оқитын білім алушылардың саны жыл сайын артып келе жатқанын атап кеткен жөн.
Әрбір 5 реформаны түрлі бағыттардың мамандары қарастырды. Мысалы, жаңа 59 заңға заң ғылымдарының кандидаты, Құқық пәндері кафедрасының аға оқытушысы Павел Афанасьев талдау жасады. Бірлік пен қазақстандық сәйкестікті нығайтуға бағытталған төртінші реформаның мәнін "Қазақстан халқы Ассамблеясы" кафедрасының меңгерушісі Людмила Гривенная толығымен ашты.