Оқу ордамызда "Серпін" бағдарламасы бойынша білім алатын студенттердің аталмыш бағдарламаның Республикалық Үйлестіруші Кеңесінің төрағасы Мұрат Әбеновпен кездесуі өтті. ҚР Білім және ғылым министрлігінің экс вице-министрі Мұрат Абдуламитұлы "Серпін-2050" бағдарламасы Солтүстік Қазақстан облысында қалай жүзеге асырылып жатқанын тексеру үшін келген. Кеңес төрағасы сапарының басталған және негізгі жері біздің оқу орнымыз болды.
Университетімізде "Серпін" бағдарламасы бойынша 1 және 2 курстарда 412 студент техникалық, педагогикалық және ауыл шаруашылығы мамандықтары бойынша білім алып жатыр.
Бүгінгі таңда жобаға енгізілген барлық өңір бойынша "Серпін" жастарының жалпы саны 8000-ға жуық студентті құрайды. Жылдан жылға бұл бағдарламаға жұмылдырылатын жастар саны артып келеді. Егер 2014 жылы 1 орынға 5 талапкер үміткер болса, 2015 жылы 7 адам болды.
Оқу ордамызда Мұрат Абдуламитұлын маңызды әрі қызықты бағдарлама тосты: оқу және практикалық зертханалар, мұражай, спорттық-жүзу кешені, обсерватория және дәрігерлік пункт бойынша экскурчия. Абенов 90 "Серпін" грантының иегері білім алатын инженерлік-техникалық факультетінің материалдық-техникалық базасы мен жатақханада тұру шарттарына ерекше көңіл аударды.
Студенттер қалашығы бойынша жасалған экскурсия "Серпін" бағдарламасы бойынша білім алып жатқан студенттер үшін оқу ордамызда сапалы білім алу үшін ғана емес, сонымен қатар пайдалы әрі салауатты демалу үшін де барлық жағдай жасалғанын дәлелдеді. Мұрат Әбенов университетіміздің қызметкерлер құрамының кәсіпқойлығын жоғары бағалады.