Наурыз айының соңында атап өтілетін Халықаралық Театр күніне орай "Шаңырақ", "Кривое зеркало" және "Пилигрим" секілді студенттік халықтық театрлары қалалық Қазақ сазды-драма театрының әртістерін шақырып, капустник іс-шарасын ұйымдастырды. Сахна төрінде түрлі образдар мен кейіпкерлерді сомдаған жандар көрермендерге рухани сезім сыйлады.
Сахнаға бірінші болып "Шаңырақ" театрының өкілдері шықты. Бұл театрдың әртістері түрлі түсті жарықтармен, сәнді костюмдерде жүздеген тыңдармандары алдында өздерін батыл ұстай білді. Олардың қоржынында университеттің басты сахнасында ұсынған көрсетілімдерінің саны көп.
Капустникке театр жетекшілері де қатыса алды. Атап айтқанда, "Шаңырақ" театрының режиссері Айнұр Бекманова мемлекеттік тілде ән орындады.
Тұрақты дайындықтар студенттерге шеберлікке қол жеткізуге көмектеседі. Әрбір шәкірттің жетістігі – оқытушылар үшін үлкен қуаныш. "Кривое зеркало" театрының режиссері Наталья Михайловна өз ісін жанымен жақсы көреді.
Театр өнерге құштар талай дарынды студенттерді тәрбиеледі. Студенттер республикалық және халықаралық фестивальдарға қатысып, лауреаттар атанып жатады. Осы мерекелік кешке осы студенттерді құттықтауға олардың шығармашылығын қастерлеушілер келді. Университеттің акт залынан барша келген қонақтарға орын табылды.
