Мемлекеттік бағдарламалар жастарға қандай мүмкіндік береді? Олардың бастамасын қандай ұйымдар қолдай алады? Бұл сұрақтарға "Серпін" республикалық бағдарламасы бойынша білім алып жатқан студенттердің облыстың бейінді мекемелерімен кездесуі барысында жауап берілді.
Мемлекеттік қызмет істері жөніндегі департамент, "ДАМУ" кәсіпкерлікті дамыту қоры, "Жас Отан" жастар қанаты, "Тұрғын үй жинақ банкі" акционерлік қоғамы секілді ұйымдардың өкілдері бір мақсатта кездесу өткізді. Ол - Қазақстанның оңтүстік өңірінен келген студенттерді жоғары оқу орнынан кейін бейімделуге дайындау. Жұмысқа орналасу және үй мәселелерін шешу, "Жол картасы-2020" бағдарламасына қатысу және өзге де сұрақтар көтерілді.
Кездесуде оңтүстік өңірдің студенттерін жергілікті жастармен шоғырландыру тақырыбы өзекті болды. "Жас Отан" жастар қанаты бұл мәселені шешу үшін түрлі іс-шаралар өткізеді.
Мемлекеттік қызмет істері жөніндегі департаментінің қызметкері Нұрлан Жахин мемлекеттік қызметке тұру ережделері туралы баяндап берді. 2016 жылы Қазақстан мемлекеттік қызметтің жаңа үлгісін қалыптастыруға кірісті. Мемлекеттік қызметкерлердің мансаптық сатыда өсуі байқау негізінде және меритократия қағидасы бойынша жүзеге асырылады. Мемлекеттік қызметке кіру үш кезеңді іріктеу негізінде азаматтар арасында байқау өткізу арқылы жүзеге асырылады. Іріктеудің үш кезеңі: заңнаманы білуін тексеруге арналған тестілеу, мемлекеттік органда әңгімелесу және тұлғалық қасиеттерді бағалауға арналған тестілеу.