Оқу ордамыздың кейбір студенттері оқу өндірістік тәжірибеден өтіп жатыр. География, биология, дизайн мамандықтарының 1-2 курсында білім алып жатқандар университетіміздің «Мирас» оқу-өндірістік кешенінде практикада жүр. Олар үшін өндірістік тәжірибе 6 маусымда басталған болатын.
Қаламыздан 35 шақырым алыста жатқан «Мирас» оқу-өндірістік кешені Қызылжар ауданына қарасты. Өңіріміздің ең көрікті жерлерінің бірі болып саналады. Бұл жерге университетіміздің студенттері 2004 жылдан бастап келіп, практикадан өтіп жүр. Таза табиғат аясында практикадан өту –әсіресе бірінші курстың студенттеріне өте қызықты. Болашақ дизайнерлер оқу-өндірістік кешенінің архитектурсын қағаз бетіне түсіріп жатса, маңайды өлшеп, жоспар құру география мамандығының студенттеріне жүктелген. Ал биология бағытында білім алып жатқандар кешеннің өсімдіктер мен жануарлардың түрлерін анықтауда.
Бос уақыттарын студенттер тиімді өткізеді. Түрлі спорттық шаралар ұйымдастырады. Университетіміздің білім алушылары үшін мұнда бар жағдай жасалған.