Университет қабырғасында білім алып жатқан кез-келген студент әскери кафедраға қабылдана бермейді. Өйткені талап жоғары. Аталған кафедраға түскісі келетін білім алушының сабақ үлгерімі жақсы, болаттай берік денсаулығы болуы қажет және физикалық дайындық нормативтерін, психикалық тестілеуден жақсы өтуі тиіс. Бүгінде екі жыл бұрын аталған сынақтардан сүрінбей өткен студенттеріміз әскери кафедраны аяқтап өздерінің жинаған білімдері мен біліктіліктерін көрсетіп емтихан тапсырды.
Жалпы, әскери кафедрада студенттер мына мамандықтар бойынша даярланады: «Жалпы әскери бөлімшелерді, бөлімдер мен құрамаларды жауынгерлік қолдану», «Құрлық әскерлерінде тәрбие және идеологиялық жұмыстарды ұйымдастыру», «Психологиялық жұмыстарды ұйымдастыру». Сапалы біліммен түрлі практикалық курстардың нәтижесінде әскери кафедра студенттері ертеңгі мамандықтарын жоғары деңгейде меңгерген.
1998 жылы университетіміздің қабырғасында құрылған кафедра 16 жыл ішінде 2500-ден астам запастағы офицерлер мен сержанттарды даярлады. Әскери кафедраның түлектері Қарулы Күштер, Ішкі істер министрлігі, ҰҚК шекара әскерлерінде және Қазақстан Республикасының басқа әскери құралымдарында қызмет етуде.