«Жасыл ел» бағдарламасы бойынша жұмыс істеп жатқан жастардың жұмысы қарқынды түрде өтуде. Қазір олар Петропавл қаласының маңындағы ормандарды өрттен қорғану мақсатында қауіпсіздік шараларын өткізіп жатыр.
Осыдан 11 жыл бұрын елбасының бастамасымен «Жасыл ел» бағдарламасы жұмысын бастады. Оның басты мақсаты - жастардың жазғы демалыс кезіндегі уақытын тиімді етіп, бірнеше бағыт бойынша студенттік отрядтарда жұмыс істеуге тарту. Бұл орайда Қазақстанды абаттандыру ісіне қатысып, азын-аулақ болса да нәпақа тапқысы келетін жастардың қатары аз емес. Биыл «Жасыл ел» жасағында екі қолға бір күрек тапқандардың саны 405. Олардың ішінде 23-і әуежай маңын жинап жатыр. Оның 4 біздің университетіміздің студенттері.
Жұмысшы жастарды «Жасыл ел» «сарбаздары» деп атайды. Олар таңғы 9-дан кешкі 6-ға дейін терін төгіп, елімізді көгалдандыруға өз үлесін қосады. Қызметіне жараса ай сайын жалақы да алады. Сарбаздар қатары әр жыл сайын жаңа жұмысшыларға толығып отырады. Күніне олар орманды өрттен қорғану мақсатында 1 шақырым жолды тазартады. Айта кету керек, бұл бағдарлама тек табиғатты қорғау мен экологияны сақтауға ғана емес, сонымен қатар жастардың тәрбиесі мен еңбекке баулуға да бағытталған. Жасылелдіктердің жұмысы маусымнан басталып, қазан айына дейін жалғаспақ.