1 қыркүйек білім күні университетіміздің қабырғасында салтанатты шара өтті. Ұлттық бірыңғай тестілеуден, кешенді тестілеуден сүрінбей өткен жастар бүгінгі күні университетіміздің студенттерінің қатарына қосылуда. Болашаққа нық қадам басып, өздері таңдаған мамандықтарында білім алатын 1-ші курс студенттерін университетіміздің ректор міндетін атқарушы Серік Мәуленұлы Өмірбаев құттықтап, оқуларына сәттілік тіледі. Жалпы биылғы жылы университетімізге бакалавриатқа екі мыңға жуық студент, магистратураға 110, доктарантураға 6 адам білім алуға түсіп отыр. Ал «Серпін-2050» мемлекеттік бағдарламасымен оңтүстік өңірлерден келген 233 жас оқитын болды. Бірінші курс студенттеріне университетіміздің барлық мүмкіндіктері таныстырылды. Олар сабақтан бөлек әр түрлі үйірмелерге және шараларға қатыса алады. Солардың бірі «Жігіт сұлтаны» мен «Университет маржаны» сайыстары салтанатты мерекеде көрініс тапты. Шара барысында университетіміздің шығармашыл студенттері өз өнерлерін көрсетті. Өнерлі студенттер бұнымен шектелген жоқ. КТК ойыншылары әзіл айтып жиналғандарды бір күлдірсе, әнші жігіттер әсем әннен шашу шашты. Салтанатты жиын флешмобпен аяқталды.