Фостер Гултом мырза Қазақстан Республикасындағы Индонезия Республикасының елші лауазымында 5-ші жыл қызмет атқаруда. Солтүстік Қазақстан облысында ол бірінші рет. Елшінің айтуы бойынша, Қазақстанның қандай да болсын аймағына сапар шексе, жергілікті университтер – міндетті бекет. Осылайша Гултом мырза екі ел университеттері арасындағы қарым-қатынас орнатылуына жағдай жасайды. Бүгінгі таңда елшінің көмегімен 8 меморандумға қол қойылды.
Жақын арада М. Қозыбаев атындағы СҚМУ-де индонезиялық ЖОО-серіктес пайда болмақ. Фостер Гултом университет әлеуетін жоғары бағалады. Ректор Серік Өмірбаевпен бірге олар болашақ ынтымақтастық жолдарын жоспарлады. Техникалық инженерия, ауыл шаруашылығы және агрономия сияқты бағыттар екі тарап үшін басым болып табылады.
Студенттермен кездесуде Фостер Гултом Индонезия университеттерінде шетел азаматтарына арналған шәкірақылық бағдарламалар туралы сөз сөйледі. Олар негізінен Индонезия тілі, мәдениеті және өнерін оқытуға бағытталған.
Индонезиялық делегация сапары болашақ ынтымқтастық негізін қалап қана қоймай, студенттер мен университет қызметкерлері үшін нағыз мерекеге айналды. Оларға арнап Индонезиядан келген қонақтар шуақты елдерінің мәдениетімен таныстыратын концерттік бағдарлама әзірледі.
