Ағымдағы аптада М. Қозыбаев атындағы СҚМУ-інің бас алаңында қаңтардың 29-шы жұлдызында бастау алатын 28-ші Бүкіләлемдік қысқы универсиада ойындарының алауы жағылды. Айтулы шараға өңіріміздің беделді спортшылары және университет басшылығы қатысты. Алау Эстафетасы - Универсиаданың ең жарқын оқиғасы. Ол Қазақстанның 16 қаласын аралап, жермен 200 астам километр және әуемен 2300 км жүріп өтеді. Петропавл – Универсиада алауын қабылдаған Ел ордасы Астанадан кейінгі 2-ші қала. Қызылжардағы эстафета унверситетіміздің басты алаңынан бастау алды. Универсиада алауын жағу салтанатын ашу мәртебесі облыс әкіміне бұйырды. Өз сөзінде ол аталмыш халықаралық спорттық іс-шараның Қазақстан жерінде өтуі үлкен мәртебе екенін атап өтіп, спортшыларға сәттілік тіледі. Көп кешікпей алаңға 2017 жылғы универсиада ойындарының символы – сұңқардың балапаны шықты. Ол жас спортшы-студенттердің жеңіске деген ұмтылысын бейнелейді. Сонымен қатар, салтанат барысында өңіріміздің және университетіміздің өнерпаздары әуелете ән шырқап, мың бұрала биледі. Алау эстафетасына еліміздің түкпір-түкпірінен 1000-ға жуық алаугер қатысады. Олардың 60-ы Солтүстік Қазақстан облысының белді спортшылары, спорт, ғылым және мәдениет қайраткерлері. Алаугерлердің бірі университетіміздің студенті, болашағы зор спортшы Аманғали Бекболат. Жалпы алауды М. Қозыбаев атындағы СҚМУ ректоры Серік Өмірбаев пен облыс әкімі тұтатты. Өңір басшысы Ерік Сұлтановқа аталмыш эстафетаның бірінші алаугері атану мәртебесі бұйырды. Алаушылар алауды әр 200 м сайын бір біріне бере отырып, қаламыздың көрікті жерлерін өтіп, орталық көшелермен жүгіріп өтті. Эстафета Қызылжардың жаңа әрі басты спорт ғимараты Александр Винокуров атындағы спорт сарайының алаңында аяқталды. Универсиада Алауының қорытынды тұтандырылуы 29 қаңтар күні Алматы қаласындағы басты қысқы спорттық мерекесінің Ашылу салтанатында өткізіледі.
