2017 жылдың 7 ақпан күні М. Қозыбаев атындағы СҚМУ-да профессор-оқытушылар құрамының, қызметкерлердің және студенттерің қатысуымен «Қазақстанның үшінші жаңғыруы: жаһандық бәсекеге қабілеттілік» ғылыми-теориялық конференциясы өтті.
Кездесуді университет ректорының м.а. Серік Өмірбаев ашты.
-Азаматтық қоғамға билік тармақтары арасындағы өкілеттіктерді қайта бөлу бойынша өзгерістер ұсынылды. ҚР Конституциясына енгізілетін түзетулер бүкілхалықтық талқылауға шығарылады. Әлеуметтік-экономикалық сипаттағы маңызды шешімдерді қабылдауда шапшаңдық пайда болады. Мемлекеттік бағдарламаларды және заңдарды орындауды іске асырудың тиімділігі артады, - деп атап өтті. - Дағдарыс және тұрақсыздық жағдайында Елбасы жедел режимде экономикалық қауіпсіздікті нығайту мен Қазақстанның болашақ дамуы бойынша шешімдердің кең спектрін ұсынады. Бұл ресурстар республикамыздың экономикасын одан әрі түрлендіруге, атап айтқанда, көліктік, энергетикалық, индустриялық және әлеуметтік инфрақұрылымдарды, шағын және орта бизнесті дамытуға бағытталған.
Еліміздің президенті білім беру экономикалық өсу жаңа моделінің орталық буыны болуы тиіс деп атап өтті. Оқу бағдарламалары сын тұрғысынан ойлау қабілеттері мен ақпаратты өз бетімен іздеу дағдыларын дамытуға бағытталуы тиіс. IT-білімді, қаржылық сауаттылықты қалыптастыруға және патриотизмді тәрбиелеуге ерекше назар аударылатын болады.
Конференцияда сөз сөйлеген «Қазақ филологиясы» кафедрасының меңгерушісі, ф.ғ.к. Жанбай Қадыров, доцент, «Энергетика және радиоэлектроника» кафедрасының доценті, т. ғ. к. Юлия Герасимова, «Ақпараттық жүйелер» кафедрасының аға оқытушы, п. ғ. к. Наталья Кольева, «География және экология» кафедрасының меңгерушісі, б.ғ.к. Павел Дмитриев, басқа да спикерлер елдің бәсекеге қабілеттілігінің көбіне адами ресурсқа, ғылыми және кәсіби кадрларға тәуелділігіне ерекше көңіл аударды.
Интеллектуалды-білім беру әлеуеті – бұл білімге және инновациялық технологияларға негізделген жаңа экономиканың қалыптасуы жағдайында елдің бәсекеге қабілеттілігі мен экономикалық өсуін қамтамасыз етуге қабілетті негізгі ресурс.
Жастардың кәсіпкерлік бастамаларын іске асыру, өзін-өзі жұмыспен қамтыған халықты жандандыру мақсатында, университет студенттердің кәсіпкерлік құзыреттерін қалыптастыру және кәсіпкерлік бастамаларын жүзеге асыру мүмкіндіктеріне көп көңіл бөледі. Ағымдағы оқу жылында барлық мамандықтардың оқу жоспарларына «Кәсіпкерлік негіздері» пәні енгізілді, СҚО-ның кәсіпкерлер палатасы және Даму қорымен бірге «Кәсіпкерлік және өзін-өзі жұмыспен қамту» оқыту семинары өткізілді, өңіріміздің ірі кәсіпкерлермен кездесулер ұйымдастырылады.
ҚР Президентінің Қазақстан халқына кезекті жолдауы аясында М. Қозыбаев атындағы СҚМУ-да бірінші кезектегі бірқатар шаралар жоспарланған: 2017 жыл ішінде білім беру бағдарламаларын мамандандырылған аккредиттеу рәсімінен 100% деңгейінде өтуді қамтамасыз ету, Wi-Fi сымсыз қатынау желісін кеңейту және электронды оқу залдарының компьютерлік паркін жаңғырту, басым бағыттар бойынша ғылыми-техникалық қызметтің нәтижелерін коммерцияландыру жобаларын іске асыру үшін ықтимал инвесторларды іздестіру бойынша жұмысын жандандыру.
М. Қозыбаев атындағы СҚМУ-дың ғылыми-педагогикалық қызметі одан әрі де білім берудің сапасы мен қолжетімділігін арттыруға, ғылыми және инновациялық әлеуетті дамытуға бағытталатын болады және қазақстандықтардың әл-ауқаты өсуінің маңызды факторына айналады.
