Жастарға өмірлік қиын жағдайда, мамандық таңдауда және жұмысқа орналасуда көмектесу - осы және басқа да жастар саясатының өзекті мәселелері 15 ақпан күні М. Қозыбаев атындағы Солтүстік Қазақстан мемлекеттік университетінде өткен ҚР Дін істері және азаматтық қоғам жөніндегі министрлігінің вице-министрі Абзал Нүкеновтың жастар және студенттік бірлестіктерінің көшбасшыларымен кездесуде талқыланды.
Абзал Нүкенов көптеген жастардың оларды қолдауға бағытталған, мысалы, «ЖҚЖК-2020», «Серпін», «Дипломмен ауылға» және басқа да мемлекеттік бағдарламалар туралы көмескі түсініктері жөнінде алаңдаушылық білдірді.
– Шамасы, жастармен жас қазақстандықтар арасында танымал әлеуметтік желілер, түрлі мессенджерлер арқылы белсенді жұмыс жасау керек, - деп түйіндеді вице-министр. Ол, сондай-ақ, өскелең ұрпақ үшін пайдалы ақпарат бейнеленетін, оның ішінде мемлекеттік бағдарламалар туралы, арнайы стендтерді барлық оқу орындарында іліп қоюды ұсынды.
Абзал Нүкенов ұлдар мен қыздардың суицидтік мінез-құлығын көкейтесті проблеманың бірі деп атады. Оның пікірінше, оны тек түрлі бұқаралық іс-шараларды ұйымдастыру арқылы ғана емес, ең алдымен, қауіпті топтармен жеке, күнделікті тынымсыз жұмыс арқылы шешу керек. Жасөспірімдердің қалыптаспаған психикасына әлеуметтік желілердегі деструктивті элементтердің теріс әсері тақырыбын қозғап, вице-министр мұндай жағдайда тыйымдармен көмек көрсету жеткіліксіз деген пікірін айтты.
– Интернетте өзіміздің баламалы ақпараттық саясатымызды өрістету қажет, - деді Абзал Нүкенов.
М. Қозыбаев атындағы СҚМУ ректорының м. а. Серік Өмірбаев өз кезегінде жоғары оқу орнында жастармен өткізілетін жұмыс туралы жиналғандарды жан-жақты ақпараттандырды.
– Экономикалық мамандықтар мен «Журналистика» мамандығының 2 курс студенттері үшін «Кәсіпкерлік негіздері» элективті пәні енгізілді. Барлық мамандықтар бойынша 1 курс студенттеріне арналған ағылшын тілінде «Ақпараттық-коммуникативтік технологиялар» пәні жүргізіледі. Сонымен қатар, педагогикалық мамандықтардың 2-3 курстары үшін «Білім берудегі гендерлік тәсіл» және «Психикалық денсаулықты сақтау және алдын алу» элективтік пәндері енгізілді. Инженерлік-техникалық факультетте 2-3 курс студенттерінің оқу жоспарына «Экономиканың қазіргі заманғы салаларындағы энергия үнемдейтін технологиялар» элективті пәні енгізілді. Студенттердің дәстүрлі діни ағымдар туралы білімін кеңейту және діни сауаттылығын арттыру үшін, элективті пәндер каталогында «Дінтану» оқу курсы бар, - деп хабарлады ректор. Университетте студенттердің өзін-өзі жетілдіруі үшін барлық жағдай жасалған. Студенттік ректорат, Жастар ісі жөніндегі комитет, КТК клубы, волонтерлік орталық, студенттік кәсіподақ ұйымы, Студенттер альянсы, «Жасыл ел» студенттік жасақтары мен «Жігер» дебат клубы, «Нұр Ару» гендерлік клубы бар. Студенттер клубы, «Сұңқар» спорт клубы, үш студенттік халық театры, «Антұрнан» хореографиялық ансамблі, студенттік хор жұмыс істейді.
Кездесуге қатысқан студенттер өз сөздерінде ректормен айтылған сөздерді растады. ЖОО-да студенттік өзін-өзі басқару дамуда. Жас көшбасшылар, белсенділер республиканың басқа оқу орындарымен жұмыс тәжірибелерімен алмасады, университеттің өміріне толыққанды қатысады.
