Петропавл қаласындағы жастар сарайында Нұр Отан партиясының «Болашақ» филиалы, балалар-жасөспірім спорт мектебі мен Манаш Қозыбаев атындағы Солтүстік Қазақстан мемлекеттік университетінің бастауымен «Университет барысы» атты қазақша күрестен турнир өтті. Оған қаладағы жоғары оқу орындарының ең үздік спортшылары жиналған. Олардың әрқайсысы қарсыластарын жеңуге бар күшін салып, мықтылығын көрсете білді.
Турнир қорытындысы бойынша 70 келі салмаққа дейінгі күресшілер арасында 3 орынды Педагогикалық факультеттің 3 курс студенті Хамзенов Нұрым, екінші орынды Инженерлік-техникалық факультетінің 2 курс студенті Аманкелдиев Бақдаулет, 1 орынды педагогикалық факультетінің 1 курс студенті Алпысов Райымбек иеленсе, 80 келіден жоғары салмақта 3 орынға жаратылыстану және ауыл шаруашылық ғылымдары факультетінің 2 курс студенті Сапархан Шалқар, 2 орынға тарих, экономика және құқық факультетінің 2 курс студенті Амирбеков Ернар, ал бірінші орынға тарих, экономика және құқық факультетінің 2 курс студенті Ыбырай Нұрғали тұрақтады. Жарыс соңында жеңімпаздарға мақтау қағаздары мен сыйлықтар табысталды.