М. Қозыбаев атындағы Солтүстік Қазақстан мемлекеттік университетінде Витаутас Магнус атындағы университетет өкілдерімен кездесу өтті.
Делегация құрамында жоғары оқу орнының ректоры, профессор Йозас Аугутис және жаратылыстану ғалымдары факультетінің деканы Саулюс Мицкевичюс бар. Екі жақты кездесу барысында ынтымақтастық туралы келісімшартқа қол қойылды.
Каунас қаласында орналасқан Витаутас Магнус университеті – Литва мемлекетіндегі бакалавр және магистрлік оқулары бойынша терең білім беретін жалғыз университет. Халықаралық жоғары оқу орнында орыс, литва және ағылшын тілінде сабақ беріледі. Бүгінгі күнде білім ошағында 50 мемлекеттен келген азаматтар оқиды. Витаутас Магнус университеті әлем бойынша ең мықты 800 университеттердің қатарына жатады. Оның артықшылығы – студенттер өз еркімен сабақ кестесін таңдап, магистратура оқуы барысында мамандығын өзгерте алады екен.
Айта кетсек, халықаралық келісім біздің студенттерімізге Литва елінде білім алып, екі диплом алуға және магистранттарға шетелде тәжірибе алуға мүмкіншілік береді. Бұл университетіміздің беделін ғана арттырмай, халықаралық ғылым кеңістігіне енуіне бағытталған маңызды жолдардың бірі болып табылады.
