Білім ордамызда Неміс академиялық алмасу қызметі өкілдерінің қатысуымен «Германияда білім алу» тақырыбында семинар өтті. Делегация құрамында ақпараттық орталықтың жетекшісі Бартоломеус Минковски, Е.А. Бөкетов атындағы Қарағанды мелекеттік университеті мен Әл-Фараби атындағы Қазақ ұлттық университетінің лекторлары Штефан Кель және Флориан Так болды. Кездесу барысында шетелде білім алу мүмкіншіліктері, стипендия бағдарламасына ұсыныс жасау жолдары, сондай-ақ неміс тілін оқытудағы мәдениетаралық мәселелері талқыланды.
Неміс академиялық алмасу қызметінің штаб-пәтері Германияның Бонн қаласында орналасқан. Әлем бойынша ұйымның 50-ге жуық ақпараттық орталықтары жұмыс істеуде. Солардың бірі Қазақстанда 15 жылдай бұрын құрылған. Осы уақыт ішінде жүздеген мемлекет азаматтары Германияда білім алып, шетел оқу орындарында тәжірибе алу мүмкіндіктеріне ие болды.
Бүгінгі күнге дейін Академиялық алмасу бағдарламасы бойынша оқып келген қазақстандық студенттердің саны мың жарымға жетті. Сонымен қатар ондаған Германия ғалымдары да елімізде тәжірибемен бөлісіп, Қазақстан оқу орындарында білім беріп жатыр. Неміс орталығының университетімізбен тығыз қарым-қатынаста болуы ынтымақтастыққа және ғылым саласының ілгері басуына тікелей жол ашады.
