Маусым шымылдығы жазушы, драматург Роллан Сейсенбаевтың комедия-фарс жанрындағы "Тон туралы реквием" атты қойылымымен ашылды. Туынды тұлға бойындағы адамгершілік қасиетін сақтап, рухани құндылықтарды бағалай білуді басты арқау еткен.
Сюжет бойынша қалаға ауылдан келген бозбала теміржол вокзалындағы вагон өртін сөндіруге қатысып, тілсіз жаудан адамдарды құтқарып шығады. Сөйтіп үстіндегі қымбат тонынан айрылып қалады. Бұл жағдайды естіген жұбайы жолдасының қымбат тонын қайтарып беруді талап етіп, прокуратураға арыз жазып, у-шу шығарады. Кейіпкеріміз қаладағы дүниеқұмар, салқынқанды адамдардың арасында жүріп жаны қынжылады.
Биыл театр ұжымына жаңа әртістер қосылды, Қазақстанның түкпір-түкпірінен келген студенттер мамандығы бойынша білім алып қана қоймай, сонымен қатар сахна мәдениетіне бойлап, әртістік шеберліктерін шыңдап жатыр.
Театр әртістері рөлдерді сомдау барсында кейіпкер мінезімен жіті танысып, олардың бейнесін көрермен көкейіне жеткізуге тырысып бағуда. Театр ұжымына шығармашылық табыс, жаңа қойылымдар, әрі көрерменнің жылы ықыласына бөленулеріне тілектеспіз.