12 сәуір күні Егемен Қазақстан газетіне Елбасының «Болашаққа бағдар: рухани жаңғыру» атты мақаласы жарыққа шықты. Оның басты идеясы – біртұтас ұлт қалыптастыру және қоғамдық сананы өзгерту. Ақорданың бағдарлама құжатын жастар арасында насихаттау мақсатымен білім ордамызда студенттер мен оқытушылар құрамынан құралған жиын өтті. Бұған қоса бұл маңызды шараға «Нұр Отан» партиясының мүшелері, Қазақстанның құрметті азаматтары және облыс әкімі Құмар Ақсақаловтың өзі де қатысты. Өңір басшысы жиынның өткізілу орны кездейсоқ таңдалған жоқ дейді. Оның айтуынша, президент бағдарламасы алдымен жастарға бағытталған.
«Жаңғыру идеясын іске асыру үшін экономикалық және саяси реформа жүргізу қажет. Қоғамдық сананы өзгертуге бағытталған Елбасының мақаласы Қазақстанда барлық мемлекеттік бағдарламалардың идеологиялық негізін құрайды. Президент өз еңбегінде алдымызға бірнеше міндет қойды. Ең алғашқысы – ол бәсекеге қабілетті елге айналу. Ол үшін заманауи технология мен тілдерді меңгеру қажет. Аз уақытта мол жетістікке жеткен мемлекеттер осы басты қағидаларды ұстана отырып, дамыған елдердің қатарына енді. Сондықтан Елбасымыз бізге осындай талап қойды.
Біз еліміздің тарихын, тілін, мәдениетін жоғары ұстап, мақтан тұтыуымыз керек. Облысымызда жүзден аса ұлт бейбітшілікте өмір сүруде. Бұл кезекте жастарға айтарым – көп жылдар бойы қалыптасқан тұрақтылықты сақтауымыз жөн. Себебі бұл экономиканы алға итермелейтін басты талап. Оны Елбасымыз да айтып кеткен еді».
Екі бөлімнен тұратын Елбасының мақаласы терең мән мағынаға толы. Мәселен мемлекет басшысы алдағы уақытта прагматизм қажет дейді. Ол дегеніміз уақытты үнемді пайдаланып, болашаққа нақты жоспар құрай білу. Ұлттық кодымызды сақтай отырып, рухани байлығымызды кеңейту – біз үшін ауадай қажет. Университет ардагері, профессор Зарқын Тайшыбай Президенттің бұл сөзімен келісіп, құптайтынын айтты. Оның айтуынша, Елбасының хатында Қазақстанның басты рухани құндылықтары көрініс тапқан. Бұл өз кезекте жастарға дұрыс бағыт беріп, мол тәрбие бере алады.
«Елбасының соңғы мақаласы Қазақстанда үлкен бір рухани сілкініс туғызды. Аталмыш құжат тәуелсіздікті жаңартқандай болып, қаншама рухани сұрақтарға жауап алды. Президентіміздің атап өткен басты қағидасы – Қазақстан мәдениетін әлемге таныту. Елбасы жастарға жомарт, кең көңілді, мәдениетті, бостандық сүйгіш, адал азамат болуға шақырады. Сондықтан үлкендер бұрынғы салт-сананы іріктеп, жаңа заманға лайықты келтіруі керек. Батыс мәдениетіне еліктемей, өз мәдениетімізді, тілімізді, дінімізді жоғалтпауды ұмытпайық. Сонда Қазақстан халқы өзінің жинап-терген байлықтарын одан сайын молайтып, келешекте дамыған ұлт болады».
Елбасының хаты алдымен егеменді елде туып-өскен көзі ашық, көкірегі ояу жастарға бағытталған. Оның іске асуы халқымыздың санасын өзгертіп, ұлтымызды жаңа деңгейге шығартпақ. Ендігі мақсат айқын – Қазақстанның 30 бәсекелі мемлекеттердің қатарына енуіне бар күшті салуымыз керек.