М. Қозыбаев атындағы Солтүстік Қазақстан мемлекеттік университетінде Сібір федералдық агробиотехнология ғылыми орталықтың мамандарымен кездесу өтті. Академиктердің қатарында Александр Донченко және Владимир Солошенко бар. Кездесу барысында Сібір федералдық ғылыми орталығы мен университет арасында ғылыми-техникалық ынтымақтастық жөнінде келісімшартқа қол қойылды.
Аталмыш келісім халықаралық қарым-қатынастың дамуына, инновациялық жобалардың асырылуына және корммерциализацияға бағытталған. Университет ректоры Серік Өмірбев бұл жобаның ауыл шаруашылық саласында сапалы мамандарды даярлауға септігін тигізетінін айтты. Оның сөзінше, отандық ғалымдар шетелдік мамандармен бірігіп, жаңа инновациялық технологияларды игеру қажет.
Серік Өмірбаев, М.Қозыбаев атындағы СҚМУ-дың ректоры:
– Ғылыми жобаларды іске асыру үшін ауыл шаруашылық өкілдерімен кездесу өткізу туралы шешім қабылданды. Қазақстан президенті өз жолдауында инвестицияны арттырып, бұл салаға ерекше мән беруді ұйғарғаны бізге мәлім. Сондықтан бүгінгі шараның басты мақсаты – шетел әріптестерімен бірлесе отырып, ауыл шаруашылық секторында жоғары білікті мамандарды даярлау.
Ресейдің танымал академигі Александр Донченко агробиотехнологияның маңызы зор дейді. Бүгінде Қазақстан мен Ресей бағалы өнім шығару үшін бірдей сұрыптау әдістерін қолданып келеді екен. Ғалымның сөзіне қарағанда Қазақстанның үштен бір егістік жерлері Новосибирск және Омбы қалаларынан әкелген тұқымдармен себілген. Академик екі жақ арасында орнатылған келісімшарт зоотехнология мен биотехнологияның жаңартылған түрін енгізуге көмектеседі дейді.
Александр Домченко, академик:
– Сібір федералдық ғылыми орталығы Қазақстанның көптеген аймақтарымен келісімшартқа отырды. Оның ішінде Солтүстік Қазақстан облысы да бар. Біз аграрлық білім беру жүйесіне жаңа үрдіс енгізу мақсатымен келдік. Алдағы уақытта жергілікті малшылармен кездесіп, мал инфекциясымен күресу үшін оларға ғалымдардың жаңа ойлап тапқан жүйесін ұсынуды жоспарлап отырмыз.
Азық-түлік өндірісі мен таза экология – елімізді дамытудың басты факторы. Алайда бүгінде дәстүрлі ауыл шаруашылығы заманауи әдістерді қолданғанымен - бұл жеткіліксіз болып отыр. Ресми көрсеткішке жүгінсек, 2050 жылы халық саны 9 миллиардқа дейін жетуі мүмкін. Сол себепті ауыл шаруашылық өнімдерін екі есеге арттыру қажет. Бұл ретте ғылымның бар күшін пайдаланып, жаңа технологияларды игеру – біз үшін өте маңызды.
