Елімізде экономиканың тұрақты өсуі үшін әлемдік деңгейге сәйкес кәсіби-техникалық мамандарды даярлау қажет. Осы мақсатта М. Қозыбаев атындағы Солтүстік Қазақстан мемлекеттік университетінде СҚО-ның кәсіпкерлер палатасымен кездесу ұйымдастырылды. Жиын барысында университет ректоры Серік Өмірбаев ынтымақтастық жөнінде сөз қозғап, бизнес саласы бойынша білім беру жүйесін жетілдіру керектігін айтты.
Серік Өмірбаев, М.Қозыбаев атындағы СҚМУ-дың ректоры:
– Елбасының 2016-2019 жылдарға бағытталған білім беру мен ғылым дамыту жоспары бойынша біз экономиканың тұрақты болуы үшін білім беру жүйесін өзгертіп, ғылымның бәсекеге қабілеттілігін арттыруды және адами капиталын дамытуды көздеп отырмыз. Бүгінгі кездесуде оқу ордамызда кәсіпқой стандарт бойынша білім беру бағдараламаларын жасау, сонымен қатар оны әрі қарай жетілдіру, дуальді білім берудің элементтерін қолдану, кәсіпқой тәжірибелерді ұйымдастыру мен өткізу сияқты мәселелер жөнінде айтылады.
Кездесуге оқу ордамыздан қатар, кәсіпкерлер палатасының директоры Тұрар Ысқақов, Кәсіпкерлер палатасының адам капиталының жетілдіру бөлімшесінің басшысы Владимир Литвиненко, сарапшы Ирина Торопова және Петропавлдың ауыр машина жасау зауытынан келген кадр бөлімінің басшысы Гүлдана Тайжанова қатысты.
Сарапшылардың айтуынша, отандық өндірісті дамыту үшін оған барынша қолдау көрсету керек. Ол үшін инвестицияларды тартумен ғана айналыспай, кадрлардың біліктілігін арттырып, техникалық және кәсіби білім беруді жақсарту тиіс.
