Сот жүйесі мен судьялардың мәртебесі қандай? Солтүстік Қазақстан мемлекеттік университетінде құқықтық ағарту айлығы аясында аймақтық конференция өтті. Студенттер мен облыстық соттың өкілдері заң саласы бойынша жұмысқа түсудің өзекті мәселелерін талқылаған. Конференция ұйымдастырушыларының айтуынша, мұндай кездесулер мемлекеттік қызметке орналасуға және сапалы қызметкер болуға көмектеседі.
Наталья Баранова, М. Қозыбаев атындағы СҚМУ «Құқық пәндері» кафедрасының меңгерушісі:
– Солтүстік Қазақстан облысының сот әкімшілік қызметкерлерінің 40%-ы біздің унверситет түлектері болып табылады. Сонымен қатар 15% – сот алқасының мүшелері. Жыл сайын біз жүзден аса мамандарды шығарамыз. Олардың көбі сот органдарында қызмет атқарады. Бүгінгі конференцияда біз заң саласында қалай жұмыс істеу керектігі және қандай талап қойылатыны жөнінде сөз қозғадық.
Облыстық соттың персоналды басқару бөлімінің басшысы Мұратбек Өтепов сот органдарында мемлекеттік қызметтен өту тәртібі туралы сөз қозғады. Ол «Заң маманы азаматтардың бостандықтары мен мүдделерін қорғауды, және Қазақстан Республикасының Конституциясы мен халықаралық қағидалардың орындалуын мақсат етуі шарт», – дейді. Ал судьялар одағының Ардагерлер Кеңесінің төрағасы Қазыкен Досанов бүгінгі сот жүйесінің буындарын қарастырған. Ол болашақ мамандарға заң қызметкерлерінің жеке және кәсіби қасиеттері туралы баяндап берді. Студенттер осындай шаралардың өткізілуі болашақта өз орнын табуға, сондай-ақ, білімін шыңдатуға мол әсерін тигізеді дейді.
Естеріңізге салсақ, таяуда облыстық сот пен университет арасында ынтымақтастық жөнінде келісімшартқа қол қойылған болатын. Бұл келісімнің арқасында студенттер заң органдарында тәжірибеден өтіп, құқықтық сауатын арттырады.