Франц Шуберттің 220 жылдығына арналған концерт өтті

Университет қабырғасында педагогикалық факультетінің ұйымдастыруымен әлемдік классика жауһары – Франц Шуберттің 220 жылдығына арналған сазды кеш өтті. Концертте композитордың атақты "Экспромт" әуені және Ференца Листтың өңдеуінде "Серенада", "Вальс", "Паганини" сияқты қайталанбас шығармалары орындалды.

Франц Шуберт – Австрияның әйгілі композиторы, ол музыкада романтизм бағытының негізін қалаған. Ұйымдастырушылардың айтуынша, әлемдік аренаға шығу үшін біз тек өзіміздің домбыра, қобыз ұлттық аспаптардың құлағын ғана бұрамай, классика композиторларының әуендерін де білуіміз шарт.

«Музыка – жүрек тілі, ол – сезімдер мен көңіл-күй әлемі» деп, бекер айтылмаған. Қоғамның тілін тауып, адамзаттың жүрегін өзінің бірегей өнерімен жаулап алған Франц Шуберттің әуендері тыңдармандарды елең еткізді. Музыканттар ұлы тұлғаның шығармаларын шебер орындап шықты.

Айта кетейік, аталмыш концерт университетіміздің 80 жылдық мерейтойы аясында ұйымдастырылып отыр. Мұндай шара жастардың классикалық талғамын дамытып, музыкаға деген ынтасын арттырады. Концерт барысында  барлық өнерсүйер қауым орындаушыларға зор ықылас білдіріп, қошеметтерін көрсетті.