Білім ордамызда Қазақстан халқы ассамблеясы кафедрасының ұйымдастыруымен «Сәндік қолданбалы өнер: кәсіптің пайда болуы мен қалыптасуы» атты аймақтық ғылыми-әдістемелік семинар өтті. Шараның мақсаты – Қазақстан аумағында бірлік туының астында өмір сүріп жатқан ұлт өкілдерінің қолданбалы өнерін сақтау және қайта жаңғырту жолдарын тауып, өскелең ұрпақтың ұлттық өнерге деген қызығушылықтарын арттыру.
Людмила Гривенная, ҚХА кафедрасының меңгерушісі: «Қазақстанда 130-дан астам ұлт өкілдері тату тәтті өмір сүруде. ҚХА міндеті – барлық этностардың тілдік және мәдени ерекшеліктерін сақтау. Сәндік-қолданбалы өнер – кез-келген ұлттың қазынасы және тарихы жайлы сыр шертетін ерекше өнер түрі. Оны барынша сақтап, дамыту мақсатымен біз осындай шара ұйымдастырып отырмыз. Сонымен қатар мұндай жиын арқасында сәндік бұйымдар жасап шығаратын шағын не орта бизнес ашу туралы жастарға ой салдық».
Семинарға университеттің профессорлық-оқытушылар құрамы мен студенттерімен қатар, облысымыздың қолөнер шеберлері мен сарапшылары, облыстық этномәдени бірлестіктер өкілдері және қалалық білім беру мекемелерінің ұстаздары қатысты. Жиын барысында мектеп оқушыларын еңбекке баулу мақсатымен өнер және технология пәні мұғалімдеріне ерекше көңіл бөлінді. Өйткені бала кезінен өнерге деген қызығушылық артса, ұлттық қазынамызды сақтап, келер ұрпаққа жеткізу – тиімді жолдардың бірі, дейді мамандар.
Шараға Ресейлік оқу орындарының өкілдері де белсене ат салысты. Мәселен, Омбы Мемлекеттік университетінің ІІІ курс студенті Ирина Приймак өз баяндамасында Омбы облысындағы сәнді-қолданбалы өнер саласының даму деңгейі және келешегі жайлы сөз қозғады. «Ұлттық өнер – жан-жақты құбылыс. Оны дәріптей отырып, салт-дәстүрімізді сақтап, рухымызды байытамыз».
Семинарлық залда келгендер үшін мектеп оқушылары мен өңіріміздің колөнер шеберлерінің жасаған бұйымдары ұсынылған шағын көрме ұйымдастырылды. Мұнда қазақ, қырғыз, орыс, украин және өзге ұлттардың тұрмыстық заттары, әшекей бұйымдары мен ұлттық нақыштағы киім үлгілері орын тепті.
