СҚМУ саяси қуғын-сүргін және аштық құрбандарын еске алды

Қазақ тәуелсіздік алғалы талай заманды өткерді, талай қиыншылықты бастан кешірді. Ұлт үшін басын қиған боздақтардың есімі жұрт жадынан мәңгі өшпес. Оқу ордамызда Ақпаратты технологиялар факультетінің ұйымдастыруымен 31 мамыр – саяси қуғын-сүргін  және аштық құрбандарын еске алу күні қарсаңында дөңгелек үстел өтті. Оған факультеттің оқытушылары қатысып, студенттер әзірлеген баяндамаларын оқыды.

Жиын барысында студенттер КСРО кезінде репрессияланған қазақтар туралы сөз қозғап, талқыға салды. Тарихқа жүгінсек, Қазақстанда 105 мыңдай адам қуғын-сүргінге ұшырады, ал 23 мыңнан астамы ату жазасына кесілді. Олардың арасында қазақ зиялылары – ғалымдар, мәдениет және саясат қайраткерлері болды. Кеңес үкіметі «Алаш» деп ұрандаған ұлттық көсемдері мен автономия құру идеясын қолдаған азаматтарға жала жауып, қоғам арасында теріс пікір қалыптастырған. Қазақтың мүддесін қорғаған Ахмет Байтұрсынов, Сәкен Сейфуллин, Мағжан Жұмабаев және өзге де жанашырлар «Ұлтшылдар», «жат пікірдегілер» деп айыпталып, құрбан болған. Алайда халықтың намысын қорғаған ұлылардың есімі ешқашан ұмытылмас. «Алаш туы астында күн сөнгенше сөнбейміз» деген  сөзге бекіген қазақ зиялылары ұлттың жоғалмауын, мұраттың жойылмауын көздеді. Олар мәңгілік, бірегей ел болудың үлгісін көрсетіп, қалай да болсын ұлтымызды сақтап қалуға жанын салған адамдар.