Қазақтың байтақ даласы бүгінде 130-дан артық ұлт өкілдеріне ортақ отан болып тұр. Сол себепті де 1 мамыр – Қазақстан халықтарының бірлік күні болып есептеледі.
Біздің еліміз үшін бұл ең ірі мерекелердің бірі. Еліміздің барлық өңірлерінде дерлік 1 мамыр тойланады. Оның мақсаты, ел ішіндегі түрлі ұлт пен дін өкілдерінің бір-біріне деген сый-құрметін арттырып, татулықты, бірлікті, ортақ құндылықтарды насихаттау болып келеді.
Осыған орай, М. Қозыбаев атындағы Солтүстік Қазақстан мемлекеттік университетінің 3 ғимаратында «Орыс тілі және әдебиет» кафедрасының студенттері Бірлік күніне арналған фестиваль ұйымдастырды.
Іс-шараны жүргізушілер әр түрлі тілде бастады. Кейін елімізде тұратын ұлттардың салт-дәстүрлерімен таныстырды. Алғашқы салт-дәстүр қазақ халқының ертеден келе жатқан қыз ұзату дәстүрін, оның талаптарын назарға салды. Сондай-ақ, славяндардың Иван Купала, татар халқының Сабантой мерекелерімен таныстырып өтті. Әрі қарай бұл фестиваль қызықты ойындар және билермен жалғасты. Айта кетейік, бүгінгі таңда университетімізде 32 ұлттың қызметкерлері, студенттері мен магистранттары жұмыс істейді.
