Өңірімізде саяси қуғын-сүргінге ұшыраған жандардың есімдерін қайтарып, мәңгілік есте қалдыру үшін «Қаһармандар» республикалық қоғамдық қорының филиалы ашылмақ, соған орай М.Қозыбаев атыдағы СҚМУ-да 2018 жылдың 14 қыркүйек күні іс-шара өтті.
«Қаһармандар» республикалық қоғамдық қорының негізгі мақсаты – Отан деп отқа түсіп, ойда жоқта опық жеп қалғандардың есімдерін ақтап, мәңгілік есте қалдыру.
Бүгінгі таңда солтүстік өңірде «Память» Қоғамдық Қоры жұмыс істейді. Ол ұйымның төрағасы Болат Сағындықов. Бұрынғы НКВД түрмесінің орнында орнатылған, мемориалды тақтаға Саяси қуғын-сүргін құрбандарының есімдері жазылғаны дәл осы ұйымның еңбегі екен.
Тәуелсіздік жолында күрескен және сол үшін қуғын-сүргінге ұшыраған тұлғалардың ерліктерін қастерлеу ұрпақтар санасында ерекше әсер туғызады. Өткен заман тағдыры жас ұрпаққа сабақ болады. Ал ата-бабаларының ерлігін өз ұрпақтары ерекше қастерлеп, мақтан тұтуы – әр халықтың рухани заңы.
