2018 жылдың 16 қазанында «Рухани жаңғыру» аясында ұлыларды ұлықтау мақсатында және де қазақ халқының әйгілі қаһарманы, жырау, күйші, батыр, қолбасшы Қожаберген Толыбайұлының туғанына 355 жыл толуына орай, Петропавл қаласында атақты жырауға арнап ескерткіштің салтанатты ашылуы қарсаңында М. Қозыбаев атындағы СҚМУ «Қожаберген жырау- Тәуелсіздіктің, Қазақ мемлекетінің және халық бірлігінің символы» атты республикалық ғылыми конференция өтті.
Конференция жұмысына көрнекті ғалымдар, белгілі қоғам және мемлекет қайраткерлері, жоғары оқу орындарының ректорлары, тарихшылар, әдебиеттанушылапр, ақындар мен жазушылар, ұйым өкілдері, ардагерлер, СҚМУ профессорлық – оқытушылар құрамы, студенттер, ҚР ҚК ӘИ курсанттары қатысты.
Конференция тарихи тұлғаның азаматтық келбетін, батырлық бейнесін ашып көрсетуді және оның ел үшін жасаған ерен ерлігін өскелең ұрпаққа үлгі ету, отаншылдық қасиетін арттыру және жаңғыру бағытындағы ұлыларды дәріптеуді жүзеге асыру мақсатында ұйымдастырылды.
Конференцияны М.Қозыбаев атындағы СҚМУ ректоры Серік Өмірбаев ашты. Сөз кезегін СҚО әкімінің орынбасары Мадияр Қожахмет жалғастырып, жиналғандарға жылы лебізін білдірді.
Алматы, Астана, Қостанай қалаларынан келген профессор, докторлар жеке тұлғаның шығармашылығын, зерттелген жаңашыл қырларын баяндамаларында сөзге тиек етті. Сөз сөйлеген ғалымдар жыраудың ғибратты ғұмырынан ой толғады.
Конференцияны қорытындылай келе, Қожаберген Толыбайұлының мұрасын жан-жақты насихаттап жүрген адамдарға атаулы медальдар тапсырылды.
Конференцияның жалғасы Петропавл қаласының кіре берісінде қазіргі таңда Қожаберген көшесі аталған атақты тарихи тұлғаға ескерткіштің ашылу салтанатты өтті. Ескерткіштің ашылуына СҚО әкімі Құмар Ақсақалов пен «Нұр Отан» партиясы Төрағасының бірінші орынбасары Мәулен Әшімбаев қатысты.
Қожаберген жырау ескерткішін Алматы қаласының мүсіншісі Қазыбек Сатыбалдиннің айтуынша, мүсінді жасау үшін шамамен алты ай уақыт кеткен. Ал идеясы 10 жыл бұрын пайда болған. Мүсіннің салмағы 6 тоннаны құрайды.
