Өткен аптада Шымкент қаласындағы химия, биология бағытындағы Назарбаев зияткерлік мектебінің оқушылары қала қонақтары болды. «Туған елге тағзым» деп аталатын экспедициялық жобамен келген жас зияткерлер еліміздің солтүстік қалаларын аралап жүр екен. М.Қозыбаев атындағы СҚМУ ғылыми әлеуетімен танысу саяхаттың басты мақсаттарының бірі. Оқушылар, алдымен, еліміздегі көлемі жағынан екінші болып табылатын телескопы мен планетарийі бар обсерваторияны аралады. Онда аспан әлеміндегі құбылыстар жайында ғалымдардың таныстыру дәрісін тыңдап, мол мағлұматтар алды.
Оқу орнының 76 жылдық тарихы сақталған университет тарихы мұражайы жас қонақтардың ерекше назарына ілікті. Әсіресе, археологиялық экспедицияларда табылған заттар өңір тарихынан сыр шертіп, жас ғалымдарға келешектегі ғылыми ізденістеріне түрткі болды.