2018 жылдың қарашаның 15-і М. Қозыбаев атындағы СҚМУ-да «Мен Мағжанмен мақтанамын» атты ашық микрофон шарасы ұйымдастырылды. Бұл шараны ҚР Президенті Н.Ә. Назарбаевтың «Рухани жаңғыру» ұлттық бағдарламасы аясында өткізді. Оған университетіміздің барлық факультеттің студенттері ат салысты.
Ашық микрофонның өткізілу мақсаты – М. Қозыбаев атындағы СҚМУ жастарының арасында қазақтың біртуар ақыны Мағжан Жұмабаевтың өшпес жырларын насихаттау арқылы жастардың шығармашылық қабілеттілігін арттыру болып табылады. Дәстүрлі ашық микрофон байқауы М. Жұмабаевтың ескерткішінің алдыңда бастау алды. Ол жерде математика және жаратылыстану ғылымдары факультетінің студенттері дара тұлғаның туындыларын оқуды жөн көрді.
Кейін, № 6 оқу корпусының кітапханасында педагогикалық факультеттің студенттері де солтүстік өңірінің мақтанышы М. Жұмабаевтың өлең шумақтарын жатқа айтты. Сонымен қоса, бұл жиынға тарих, экономика және құқық факультетінің студенттері мен оқытушылары да белсенді қатысты. Осы мерейлі шараны тіл және әдебиет институтының студенттері жапты. Олар да М. Жұмабаевтың шығармашылығынан үзінділерді оқып, өздерін қызықтырған сұрақтарды қойды.
