Биыл Қазақстан Республикасының ұлттық валютасына 25 жыл толды. Осы жылдар бойы елдің негізгі ақша бірлігі әлемдік нарықта өзінің позициясын нығайтып, тәуелсіз Қазақстанның нышанына айналды.
2018 жылдың 28 қарашасында М.Қозыбаев атындағы СҚМУ-да ұлттық валютаның 25 жылдығына арналған «Теңге – Қазақстан тәуелсіздігінің нышаны» тақырыбында конференция өтті. Аталмыш жиынды студенттік ректорат ұйымдастырды. Кішігірім көрмеде теңгенің қалыптасуының тарихы мен ҚР қаржы министрлігі және банк секторымен ынтымақтастық саласындағы университеттің жетістіктері көрсетілген кітаптар ұсынылды.
Конференция барысында тәрбие жұмысы және әлеуметтік мәселелер жөніндегі проректор м.а Сабыр Ибраев қатысушыларға елдегі ақша айналымының эволюциясы мен «теңге» сөзінің этимологиясын туралы кеңінен түсіндіріп өтті. Сонымен қоса, шарада «қаржы» мамандығының студенттері Диана Сапарова мен Анастасия Парамонова марапаталды. Себебі олар СҚОФ Ұлттық банкі ұйымдастырған «Ұлттық валютаның теңгерімі мен тарихы» тақырыбындағы эссе байқауының жеңімпаздары.
Жиынға қатысушылар ұлттық валюта даму жолында бірнеше дағдарыс толқындарын бастан өткергенін және бүгінгі күні ол өз позицияларын сенімді дамытып, жақсартқанын атап өтті.
