2018 жылдың желтоқсанның 10-і М. Қозыбаев атындағы СҚМУ-да «Табысқа-бірге» тақырыбында форум өтті. Алқалы жиынды ЖІК ұйымдастырды. Форумға жалпы саны 40-қа жуық университетіміздің студенттері ат салысты. Шарада танымал қазақстандық кәсіпкер, қоғамдық қайраткер, демеуші Сайран Хамзин қонақ дәрісін оқыды. Кездесу барысында ол өзінің осындай жетістікке апарар жолын баяндады. Қонақ дәрісі төңірегінде табысты қазақстандық кәсіпкер университет студенттерімен өзінің өңірімізде бизнесті жүргізу мен дамыту тәжірибесімен бөлісті.
Бұл кештің құрметті меймандарының арасында «Арай» би ансамблінің көркемдік жетекшісі – Диляра Сабырова да бар. Ол осыдан 10 жыл бұрын шағын үйірме ашып, онда тек 12 бала ғана болғанын күлкімен еске алады. Бүгіндері ансамбльде 100-ге жуық жас бишілер тәлім алады. Талмас талант пен ерен еңбектің арқасында «Арай» бишілер тобы тек қана өз өңірімізде ғана емес елімізге танымал болғаны бәрімізге мәлім. Сол себепті, Диляра Сабырова жиылғандарға өз арманына сеніп, оның орындалуы үшін күш, жігерді аямау керек деп кеңес берді.
Сонымен қоса, форумда 23 жасар суретке түсіруші Сага Сан да өзінің кәсіби шеберлігімен бөлісіп, қатысушыларды қызықтырған барлық сауалдарға жауап берді. Осылайша, кәсіпкерлер студенттік жастарға өздерінің ақыл-кеңестерін беріп, Қазақстанның дамуына өз үлесін қоса алатын жоғары білімді және патриот азаматы болуға шақырды. Айта кету керек, форумда дәрістен бөлек, кофе-брейк ұйымдастырылды.
Ал кездесудің соңында ЖІК төрағасы Богдан Петров спикерлерге қызықты әрі мәнді әңгімелері үшін алғыс білдіріп, меймандар мен серіктестерді грамоталармен марапаттады. Сонымен қатар, жиында университетіміздің белсенді студенттеріне ЖІК мүшелерінің билеттері табыс етілді.
