2018 жылдың желтоқсанның 12-сі М. Қозыбаев атындағы СҚМУ-да «Тәуелсіздікті жырлаймыз!» тақырыбында ән фестивалі өтті. Аталмыш шараны Қазақстан Республикасы Тәуелсіздігі күніне орай тіл және әдебиет институтының практикалық қазақ тілі кафедрасы және тәрбие жұмысы жөніндегі департаменті ұйымдастырды. Фестивальге университетіміздің әр факультетінен барлығы 22 студент ат алысты.
Атап өткен жөн, фестиваль байқау түрінде өткізілді. Ән орындаушыларға отан, атамекен, туған жер тақырыбында патриоттық өлеңдерді орындау талабы қойылды. Сайыста әнді көрерменге жеткізе білу деңгейі, тақырып бойынша ән таңдауы ,сахна мәдениетін сақтауы мен таныстырылымға аса назар аударылды. Сонымен бірге актерлік шеберлігі мен микрофонмен жұмыс жасай білуі бағаланды.
Іс-шараның басты мақсаты: айтылған әндердің туған елге, Қазақстанға деген патриоттық сезімін, сүйіспеншілігін одан әрі ұластыратын ән-жырлармен келген қонақтарды таныстыра отырып, отанды сүюге, оның байлығын, кең даласын қорғауға тәрбиелеу, өнерлі студенттер мен университет қызметкерлерін анықтау.
Байқауда әділ қазылар алқасы 5 адамнан құралды, олардың арасында қалалық білім бөлімінің әдіскері Гауһар Темірбаева да бар. "Тәуелсіздікті жырлаймыз" фестиваль қорытындысында бас жүлдеге педагогикалық факультеттің студенті Аділет Садаев ие болды. Бірінші орынды инженерлік және сандық технологиялар факультеттің студенті Аружан Ерденова – «Гүлстан Қазақстан» әнімен қанжығасына байлады.
Ал екінші орынды Тіл және әдебиет институтының білім алушысы Жұлдыз Ескендірова алса, үшінші орынды педагогикалық факультеттің студенті Ольга Гейн иеленді. Жеңімпаздар мен жүлдегерлерге кубоктар және грамоталар табысталды. Айта кететіні, университетімізде бұл фестиваль екінші рет ұйымдастырылып отыр. Алдағы уақытта аталмыш шара жалғасын таппақ.
