М. Қозыбаев атындағы СҚМУ- студенттерге тек білімді ғана шектемейді. Олар үшін көптеген қызықты іс-шараларды да өткізеді. 2019 жылдың 14-ші ақпанында білім ошағымыздың 1 корпусында тағы бір мәрте көптен күткен «Университеттегі түн» шарасы өтті. Оны әдеттегідей оқу ордамыздың Жастар ісі жөніндегі комитеті ұйымдастырды.
Белсенділер ұйымдастырған бағдарлама биылғы оқу жылында осымен үшінші рет өткізіліп отыр. Бұл жолғы түн бұрыңғылардан қарағанда ерекше өтті. Себебі, бұл түнде мафия ойыны, караоке, фотозона, тәтті тағамдардан бөлек, көріпкел де болды. Алдағы өмірін қызықтырған әр адам көріпкелден барып, өз болашағын барынша біле алды. Кеште жүздері қуанышқа толы болған қатысушылардың жартысы сахна төрінде танымал шетелдік және қазақ эстрадасының әндерін орындаса, басқалары өз өнерін көрсетті. Ал енді біреулері көңілді атмосферада қызықты «Мафияны» ойнады.
Жастар ісі жөніндегі комитетінің төрағасы Богдан Петровтың айтуынша: «бұл шараның мақсаты: студенттерді тек біліммен шектемей, оларға біраз демалуғада мүмкіндік беру.»,- деп отыр. Ән айтып, би билеген студенттердің көңіл-күйлері көтеріңкі болды. Енді келесі университеттегі түнді білім алушылар асыға күтуде.
