Төрт құбыламызды тең етер жылдың төрт мезгілінің төресі Әз Наурыз – тамырын тереңнен тартқан, береке мен татулықтың, тазалық пен ізгіліктің тұғырын нығайтатын, жаңашылдықтың, белгісі. Тәуелсіз мемлекетіміздің қалыптасуымен бірге Наурыз мейрамы барлық қазақстандықтар үшін жалпыхалықтық мерекеге айналды. М. Қозыбаев атындағы СҚМУ 2019 жылдың 20-шы наурызында бұл ұлық мерекені дәстүрлі түрде кең көлемде атап өтті. Мереке білім орданың 1 оқу корпусының алаңында ұйымдастырылды.
Мейрамның ашылу салтанатында бас алаңға университетіміздің әншілері ақ боз атқа мініп келіп, әуелете ән шырқады. Содан соң, құттықтау сөзі М. Қозыбаев атындағы СҚМУ бірінші проректоры Ербол Исақаевқа берілді. Ол барша қауымға жылы лебіздерін білдіріп, оқу ордамыздың бірқатар ұстаздары, қызметкерлері және студенттеріне университет ректоры грамоталарын табыстады. Жиылғандардың жақсы көңіл-күйін олардың жүздерінен және асық, қанат тарту, тоғызқұмалақ сынды ұлттық ойындарда өз бақтарын сынауға асыққандарынан байқадық.
Сондай-ақ, Ұлыстың Ұлы күніне орай университет алаңында ақ қанатты киіз үйлер тігілді. Онда ЖОО ұжымы ұлттық тағамдарды дастарханға үйіп-төгіп, ішке құттықтай кірген қонақтарды қарсылаудан шаршамады. Меймандарға наурыз көже, палау, бауырсақ және қымыз сияқты дәстүрлі астармен тамақтандырды. Ал сахна төрінде университеміздің белсенді студенттері өз өнерлерін ортаға салды.
Бұнымен қоса, бұл күні домбыра күмбірі толастамады. Шабыттана, шарықтай салған әуендер, билер, қағытпа сөздер мерекелік көңіл-күйді өз шыңына жеткізді. Атап өткен жөн, шара барысында облыстық филармонияның әртістері де концерттік бағдарламалаға ат салысты.
Ал Әз-Наурызды тойлауға жиылған ұстаздар мен студенттер барша қауымды ұлы мейраммен шын жүректен құттықтады. Бүгінгі күні Наурыз көктем мен бірліктің жалпыхалықтық мерекесі. Бұл мейрам көпұлтты Қазақстанда тұратын барлық адамдарға бірдей қымбат. Ежелгі мереке дәстүрлердің сабақтастығын сақтай отырып, қазіргі заманғы өмірге үйлесімділігі.
