М. Қозыбаев атындағы СҚМУ-да «Сергектік және денсаулық» спартакиядасы әлі де жалғасуда. Соның негізінде 2019 жылы наурыздың 27-ші жұлдызында білім ордамызда оқытушы-профессорлық құрамы мен қызметкерлер арасында жүзуден жарыс өтті. Бақталасты университетіміздің «Сұңқар» спорт клубы мен «Дене шынықтыру» кафедрасы бірлесіп ұйымдастырды.
Жалпы, жарыста оқу ордамыздың әр факультетінен 30-ға жуық адам қатысты. Сайыс екі айналымнан тұрды. Алғашқысында әр қатысушы жеке біріншілікке жарысты. Ал келесі айналым эстафета болды. Онда команда қатысушылары 4х50 метр қашықтығында жүзді.
Нәтижесінде, жеке біріншілікте ерлер арасында бірінші орынды Тарих, экономика және құқық факультеті «Экономика және есеп» кафедрасының меңгерушісі Дінмұхаммед Шайкин иеленсе, айелдер арасында 50 метр қашықтықты 38 секунда жүзіп, алғашқы болып Педагогикалық факультеті «Дене шынықтыру» кафедрасының оқытушысы Ольга Вернер атанды.
Ал эстафетаның қорытындысы мен жалпы командалық есеп бойынша педагогикалық факультет жеңімпаз атанды. Қызықты бақталастың жеңімпаздары мен жүлдегерлеріне дипломдар табысталып, шара соңында барлық қатысушылар мен жарыс төрағалары естелік суретке түсті.
