2019 жылдың 29 наурызында Петропавл қаласында «Шексіз педагогикалық кеңістік» физика пәні мұғалімдерінің бірінші халықаралық форумы бастау алды. Жиынның пленарлық отырысы негізгі бағыттар бойынша 5 секцияның жұмысын қамтыды. Аталмыш пленарлық кездесулер М.Қозыбаев атындағы СҚМУ қабырғасында өтті.
Жиынға жалпы білім беретін және мамандандырылған мектептердің физика мұғалімдері, педагогика және физиканы оқыту әдістемесі бойынша мамандар, техникалық және кәсіптік білім беру ұйымдарының физика мұғалімдері, бастауыш сынып мұғалімдері, оқу ордамыздың оқытушылары ат салысты. Барлығы 35 ұстаз. Бұл білім берушілер еліміздің әр өңірлері және РФ келгендер.
Іс-шараның негізгі мақсаты: ғылыми әлеуетті дамыту аясында физика мұғалімдерінің педагогикалық шеберлігін жетілдіру. Атап өту қажет, отырысты СҚО әкімдігінің "Білім саласындағы әдістемелік жұмыс және ақпараттық технологиялық орталық" КММ және М.Қозыбаев атындағы СҚМУ бірлесе ұйымдастырды.
Шара барысында білім мен ғылымның өзара іс-қимыл жолдары мен келешегі, тиімді педагогикалық тәжірибені тарату, педагогикалық практиканың жетістіктерін насихаттау, педагогтардың өздігінен білім алу және кәсіби өзін-өзі дамыту процестерін ынталандыру тақырыптары кеңінен талқыланды. Сондай-ақ, мұғалімдер үшін жалпы физика зертханасында мастер-класстар өткізілді.
Секция жұмысының қорытындысы бойынша облыс мектептерінің физика пәні мұғалімдеріне арналған әдістемелік ұсыныстар дайындалады.
