2019 жылдың сәуірдің 3-і ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің СҚО бойынша департаменті мен М. Қозыбаев атындағы СҚМУ арасындағы өзара ынтымақтастық туралы меморандумға қол қойылды. Бұл бастама студенттерге мемлекеттік қызметте еңбек жолын жүзеге асыру үшін қажетті дағдыларды алу және облыстық мемлекеттік органдарында өндірістік тәжірибеден өтуге мүмкіндік береді.
Жиын барысында ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің СҚО бойынша департаменті мамандары университетіміздің 4 курс студенттеріне бөлімшедегі бос орындар туралы айтты. Сондай-ақ, мемлекеттік және құқықтық қорғау қызметтеріне түскісі келетіндер үшін емтиханның сұрақтарын талқыға салды.
Шараның негізгі мақсаты: мемлекеттік қызметті дәріптеу, жастарға патриоттық тәрбие беру, мемлекеттік қызметтің оң имиджін қалыптастыру, жастарды мемлекеттік қызметке тарту.
Атап өткен жөн, департаментте «Жас қызмет» атты жас мемлекеттік қызметші мектебі 1 қыркүйектен бастап жұмысын бастамақ. Онда болашақ мамандар теориялық және практикалық білімдерін толықтырып, тағылымдамадан өтеді.
