2019 жылдың сәуірдің 18-і М. Қозыбаев атындағы СҚМУ-да Петропавл қаласының колледж түлектеріне арналған кәсіби бағдарлы кездесу өтті. Жиынға 500-ден астам талапкерлер мен олардың ұстаздары қатысты. Шараның мақсаты – болашақ студенттерді университет, оқытушылармен таныстырып, мамандықты таңдауға көмектесу.
Дәстүрге айналған жиын бұрынғыдан өзгеше өтті. Себебі талапкерлер үшін ерекше фотозона ұйымдастырылды. Сондай-ақ, жиылғандар экраннан университет жайлы түсірілген роликті, оқу ордада өткен түрлі іс-шараларды тамашалай алды. Және де қонақтар үшін тәтті тағамдардан фуршет дайындалды.
Кездесу барысында әрбір факультет өздерінің бөлімшесі туралы таныстырылымдар мен көрмелер өткізді.Онда факультет декандары мен ұстаздар мамандықтар туралы, оқу үдерісі, студенттік өмірді ұйымдастыру және басқа да көптеген сұрақтарды талқылады. Кейін СҚМУ-дың белсенді жастары жиылғандардың көңілін көтерді. Колледж түлектері қызықты ойындар мен викториналарға белсенді қатысып, өз өнерлерін ортаға салды. Содан соң, университеттегі меймандар үшін ұйымдастырылған концерттік бағдарлама басталды.
Ресми бөлімде М.Қозыбаев атындағы СҚМУ ректоры Серік Өмірбаев түлектерге университетіміздің тарихы және жоғары оқу орнымызда білім алу келешегі, бітірушілердің маңсабы туралы кеңінен атап өтті. Сонымен қатар, шара барысында академиялық ұтқырлық бағдарламасы арқылы шет елде білім алған студенттер өз тәжірибелермен бөлісіп, түлектердің басқа мүмкіндіктері бар екендігін мәлімдеді. Ашық есік күні көңіл көтерер концертпен жалғасын тапты. Онда университетіміздің өнерлі жастары келушілерді өнерпаздықтарымен тәнті етті. Студенттер әуезді әндер айтып, би биледі.
Әр адам өз өмірінде болашақ тағдырын айқындайтын бірнеше түйінді шешімдерді қабылдауы тиіс. Мамандық таңдау – соның бірі. Бүгінгі кездесуде түлектер болашақ мамандықты саналы түрде таңдады - , десек қателеспейміз!
