Ағымдағы жылдың 24 сәуірінде «Шертер» фольклорлық– этнографиялық ансамбльдің 20 жылдық мерейтойы өтті. Қазақ ұлттық өнерін, соның ішінде ұлттық аспаптық музыкасын қалың көпшілікке таныстырып, өзінің ұлттық қазынасына құрмет сезімін ояту мақсатында өткен кешке «Cаз пәндері» кафедрасының профессор-оқытушылар құрамы мен талантты студенттері қатысып, өз өнерлерін көрсетті.
Концерттік бағдарламаның басы марапаттау рәсімінен басталды. Содан соң, 20 жылдық тарихында ансамбльді көркейтуге үлес қосқан өнерпаздарды марапаттады. Атап өту керек, «Шертер» ансамблі өз қадамын 1999 жылы бастаған болатын. Содан бері, ансамбльге «Музыкалық білім» мамандығында оқитын, әр түрлі ұлтты, барлық курстардың студенттері қатысып, қазақ халқының ұлттық аспаптарында кәсіби деңгейде ойнауға дағдыланады. Жыл сайын ансамбль репертуары жаңарып, украин, орыс халық әндеріне, таяу және алыс шетел сазгерлердің шығармашылығына жаңа пьесалар пайда болады. Бүгінгі танда ансамбльдің құрамында 30-ға жуық студент тәрбиеленіп отыр. Ресми бөлімнен соң, концерттік бағдарлама жалғасын тапты. Сахнада қазақ, орыс және шетел композиторларының шығармалары орындалды. Аталмыш мерекеге ансамбль біраз уақыт дайындалғаны бірден байқалды.
«Күй өнері қазақ халқының болмысын, дүниетанымын, көңіл-күйі мен сезімін бейнелеп қана қоймай, ғасырлар бойы ата-бабаларымыздың рухани жан азығы болып келді. Біз сол ата-баба дәстүрін жас ұрпаққа дәріптеп, еліміздің түкпір-түкпірінде орналасқан мектептерге кәсіби мамандар даярлаудамыз. Барша әріптестерімді мерейтоймен құттықтай отыра, қазақтың ән-күйі таусылмасын, өнер десе ішкен асын жерге қоятын қазақтың әр шаңырағында шаттық орнасын деп тілеймін!»,-деді «Саз пәндері» кафедрасының меңгерушісі Галина Колесникова.
Нөмірлердің қойылымдары әртүрлі әсерлі және көзтартар элементтерге толы болды. Онда іс-шараның ауқымдылығы мен атап өтіліп жатқан күннің маңыздылығы байқалып тұрды.
