2019 жылдың 17 қыркүйек күні университет қабырғасында «Social develompent center» қоғамдық қоры буккроссинг акциясын жалғастырды.
Шара аясында Қазақстанның 17 қаласына 57 кітап сөресін орнату жоспарланған. Акцияны ұйымдастырушылар М.Қозыбаев атындағы СҚМУ-ға келіп, табан тіреді.
«Social develompent center» қоғамдық қоры бұл акцияны өңір әкімдігімен бірлесе ұйымдастырады. Еліміздің 7 қаласында әлеуметтік шара өтті. Нұр-Сұлтан, Алматы, Шымкент қалаларында буккроссинг 5 жерде, ал қалған өңірлерде 3 мекеме қабырғаларында орнатылмақ. Кітап сүйер қауым кітап алмастыру үшін Петропавлда М.Қозыбаев атындағы СҚМУ-ға, Қазақстан халқы ассамблеясына және жастар ресурстық орталығына келе алады.
Ұйымдастырушылардың айтуынша барлық қала тұрғындары тарапынан акцияға жақсы қолдау көрсетілген. Өңіріміздегі жалғыз ЖОО қабырғасындағы буккроссингке 3 тілде 150-ден астам кітап қойылыпты. Шараға келген студенттердің қарасы қалың болды.
«Soclal Develompent center» қоғамдық қоры бұл акцияны ел көлемінде алғаш рет өткізіп отыр. Ұйымдастырушылар Петропавл қаласынан кейін Қостанайға сапар шегіп, әлеуметтік акция аясында тұрғындарды жаңа кітаптармен қуантпақ.
