2019 жылдың 19 қыркүйегінде «Рухани жаңғыру» бағдарламасы аясында ұлыларды ұлықтау мақсатында Айыртау ауданының Қарасай ауылында Қарасай мен Ағынтай батырларының мемориалдық кешеніне 20 жыл толуымен және қазақ батырлары – Қарасайға 421 жыл, Ағынтайға 420 жыл толуына орай М. Қозыбаев атындағы Солтүстік Қазақстан мемлекеттік университеті және Солтүстік Қазақстан облысының әкімдігі «Ұлы Даланың хас батырлары» атты республикалық ғылыми-тәжірибелік конференция өткізді.
Конференция жұмысына Астана, Алматы, Қостанай, Көкшетау қалаларынан келген көрнекті ғалымдар, белгілі қоғам және мемлекет қайраткерлері, тарихшылар, өлкетанушылар, ұйым өкілдері, ардагерлер, М.Қозыбаев атындағы СҚМУ профессорлық-оқытушылар құрамы қатысты.
Конференция қазақ батырларының азаматтық келбетін, батырлық бейнесін ашып көрсетуді және олардың ел үшін жасаған ерен ерлігін өскелең ұрпаққа үлгі ету, отаншылдық қасиеттін арттыру және жаңғыру бағытындағы ұлыларды дәріптеуді жүзеге асыру мақсатында ұйымдастырылды.
Аталмыш конференция Айыртау ауданындағы Қарасай мен Ағынтай батырларға арналған салтанатты кешенді іс-шаралармен ұласатын болады.
