М.Қозыбаев атындағы Солтүстік Қазақстан мемлекеттік университетінің "Журналистика" кафедрасының ұйымдастырумен "Soltústik Qazaqstan" – бір ғасырлық шежіре" атты халықаралық ғылыми-тәжірибелік конференция өтеді. Шара «Солтүстік Қазақстан» облыстық қоғамдық-саяси газетінің 100 жылдық мерейтойына арналған. Конференция тарих, таным, тағылым, баспасөз төңірегінде еңбек етіп жүрген зиялы қауымның басын қоспақ. Қазақстан мен Ресей елінен белгілі ғалымдар келіп, сөз алады.
"Soltústik Qazaqstan" жайында тарих қойнауынан суыртпақталған мұрағат деректерінің көрмесі, басылым туралы бейнематериал мен слайд ұсынылады. Баяндамашылар газет туралы ой-тұжырымдарын ортаға салып, оның қоғамда алатын орнына баға береді. Конференцияға алаштанушы ғалым Қайрат Сақ, омбылық қонақтар "Мирас" қазақ тілі мен мәдениетін дамыту және сақтау қорының директоры Аскар Раисов, дизайнер, сәулетескерткіштері бойынша сарапшы Игорь Вахитов, Қошке Кемеңгерұлының немересі Қайырбек Кемеңгер, М. Әуезов атындагы ОҚМУ колледжінің директоры, тарих ғылымдарының докторы Сейдехан Әлібек тағы басқа ғалымдар шақырылған. Газеттің тарихымен еңбек жолын тоғыстырған жергілікті ардагер журналистер де өз естеліктерімен бөліседі.
Конференция 2020 жылдың 18 ақпанында М.Қозыбаев атындағы СҚМУ-дың 1-ші ғимаратындағы 115 дәрісханада өтеді.
Басталу уақыты: 14:00 сағ.