Қазақстандықтардың әрбір жаңа ұрпағы үлкендердің даналығынан, олардың тәжірибесі мен адамгершілік қасиеттерінен тәлім алады. Қазақстанда жыл сайын 1 қазанда Халықаралық қарттар күні атап өтіледі. Біздің ЖОО-да 447 адам университеттің ардагерлер ұйымында тіркелген. Оның активі бейресми достастық тұрғысында Басқарма төрағасының – ректордың м.а Ербол Исақаевпен кездесті.
Дастархан басына жиналған қауым тәттілерден дәм татып, жанға жайлы әңгімелерін өрбітті. Университеттің бірінші басшысы альма-матердің, студенттер мен оқытушылардың жетістіктері туралы сөз қозғады. Ербол Исақаевтың Қозыбаев университетінде «Ақсақалдар Алқасы» атты кеңесін құру туралы бастамасы бірауыздан қолдау тапты. «Сіздердің өмірлік тәжірибелеріңіз бен беделіңіз, терең біліміңіз бен даналығыңыз университеттің қарқынды дамуына септігін тигізеді деп санаймын», - деп атап өтті ол.
Бүгінде құрмет демалысындағы 90-нан астам педагог ЖОО игілігі үшін еңбек қызметін жалғастыруда. Олар жас оқытушылармен тәжірибе алмасып, білімдерін студенттерге арнайды, олардың жетекшілігімен алдыңғы қатарлы ғылыми зерттеулер жүргізілуде.
Шараға қатысушыларды ардагерлер қоғамының атынан қалалық ардагерлер кеңесінің төрағасы Жангелді Тәжин құттықтады. Студенттік ректорат өкілдері де лебіздері мен шынайы ризашылықтарын білдірді.
Жоғары оқу орнының барлық ардагерлері мен зейнеткерлерін құттықтаймыз, ұзақ өмір, мықты денсаулық, жақындарына сүйіспеншілік пен қолдау, жемісті жұмыс және шығармашылық табыс тілейміз!
