Ұлы ақын және ойшыл Абай Құнанбаевтың 175 жылдығын мерекелеу аясында Қазақстан Республикасы Ақпараттық және әлеуметтік даму министрлігі Азаматтық бастамаларды қолдау орталығы және Педагогикалық ғылымдар академиясымен бірлесіп «Мүшәйра» республикалық жас ақындар байқауын өткізді.
Байқау екі кезеңнен тұрды. Солтүстік Қазақстан облысында оған Петропавл қаласы, Қызылжар, Айыртау және Уалиханов аудандарынан келген 16 мен 29 жас аралығындағы жазушылар, ақындар, журналистер, студенттер және басқа жастардың өкілдері қатысты.
СҚО бойынша ең дарынды және талантты жастарды анықтаған байқау, Қозыбаев университетінің «Рухани Жаңғыру» әлеуметтік-гуманитарлық зерттеулер институтының қолдауымен ұйымдастырылды.
Тәжірибелі мамандарды тарта отырып, тренингтер мен мастер-кластар өткізілді: Жанар Құлыбекова (доцент, филология ғылымдарының кандидаты); Аманжол Зағыпар (халықаралық «Шабыт» фестивалінің жеңімпазы, Е. Асқаров атындағы облыстық ақындар мектебінің жетекшісі).
Қазылар алқасы қорытынды шығарып, жеңімпаздарды анықтады: Жарханат Хинаухан ( Қозыбаев университетінің «Қазақ тілі және әдебиеті» ББ студенті); Самрат Құскенов («СОВА» ЖШС қауіпсіздік бөлімінің қызметкері, Петропавл қ.); Сержан Нұрдолқын (Қозыбаев университетінің «Журналистика» ББ студенті).
Олардың барлығы 5 мен 20 қазан аралығында Алматы қаласында өтетін «Мүшәйра» байқауының республикалық кезеңіне жолдама алды. Солтүстік Қазақстан облысынан қатысушыларға сәттілік, сарқылмас талант тілейміз!
