ErasmusDays-2020 мерекесін тойлау аясында Kozybayev University "Erasmus+ жобалары : басқару, нәтиже және тұрақты даму" атты онлайн-семинар өтті. Іс-шараны Стратегия және білім сапасы департаменті, академиялық ұтқырлық және интернационалдандыру орталығы ұйымдастырды. Оның қатысушылары - жобалардың жұмыс топтарының мүшелері мен университеттің серіктестері.
С.Сейфуллин атындағы ҚАТУ Халықаралық ынтымақтастық бөлімінің бастығы Сара Қытайбекова өз сөзінде барлық жобалармен қарым-қатынас жасау, тәуекелдерді басқару тобын құру, жобаның толық журналын жүргізу қажеттігіне назар аударды.
Люблин технологиялық университетінің (Польша) профессоры Марек Милош: "Әдетте, жоба жаңа іс - қимыл және қауіп-қатер аймағы екенін, оны ұжым әрдайым қабылдай бермейтінін атап өтті. Жобаның сәттілігі үшін оны белгіленген жоспарға сәйкес орындау, нәтижелердің пайдаланушылардың үмітіне бағытталуы, менеджерді дұрыс таңдау, оның көшбасшылық қасиеттері, бақылау комитетінің болуы маңызды", - деді.
София қ. (Болгария) химиялық технология және металлургия университетінің доценті Андриана Сурлева жобалық құжаттаманы егжей-тегжейлі зерделеу үшін қатысушылардың жауапкершілігін нақты анықтауды, жұмысқа белсенді ғалымдар мен студенттерді тартуды, сондай-ақ жұмыс топтарына қаржы және заң департаменттерін қосуды ұсынды.
Семинарды Astana IT University бірінші проректоры, жобалардың жұмыс топтарының қатысушысы Серік Өмірбаев қорытындылады. Ол табысты жобаның маңызды құрамдас бөлігі әркімнің нәтижеге деген жауапкершілігі, жұмыс топтарының барлық жұмыс пакеттеріне белсенді қатысуы және ұзақ мерзімді нәтижеге бағытталған бағдарламалар мен білім беру жүйесін жетілдіру бойынша ұсыныстар әзірлеу болып табылатынын айтты.
