Қозыбаев университетте жазушы-журналист, мәдениет қайраткері, Есіл ауданының Құрметі азаматы Жақсыбай Самраттың 60 жылдығына арналған «Ұлттың абыройын ұлықтаған» атты ғылыми-тәжірибелік конференция өтті. Іс-шараны ғылым департаменті мен «Рухани жаңғыру» әлеуметтік-гуманитарлық зерттеулер институты ұйымдастырды. Өңіріміздің белгілі жазушысына арналған мерейтойға оның әріптестері, достары, университет қызметкерлері мен студенттері, зиялы қоғам өкілдері жиналды.
СҚО әкімінің атынан оның орынбасары Ғани Нығыметов құттықтау сөз сөйлеп, журналистке шығармашылық табыс тіледі. Ол ҚР еңбек сіңірген мәдениет қайраткері, Қазақстан Жазушылар одағының мүшесі, қазақстандық публицистика мен әдебиеттің дамуына қосқан зор үлесі үшін алғыс айтты.
Самрат Жақсыбай 1993 жылдан бастап журналистика саласында еңбек етіп келеді. Аз уақыттың ішінде облыс аумағында жүйрік журналист әрі белсенді қоғамдық қайраткері ретінде танылды. Сонымен қоса, ол облыстық телерадио компанияның қазақ бөлімінің редакторы қызметін атқарған. Бір кездері «Абылайдың ақ үйі» құжаттық негіздемесі болмаған соң сүріліп кете жаздады. Алайда жазушы дер кезінде бұл мәселені қолға алып, Үйдің баға жетпес ескерткіш екенін дәлелдеді.
Журналистің бүгінгі таңда қарымды қаламымен жазылған оннан артық үлкенді-кішілі кітаптары жарық көрген. Соның ішінде Желтоқсан оқиғасы туралы жазылған, «Бітеу жара» романы туралы белгілі ақын Мұхтар Шаханов, жақсы пікір білдірген. Қазір бұл роман орыс тіліне аударылуда.
Самрат Жақсыбай осы күнге дейін «Егемен Қазақстан» газетінің Солтүстік Қазақстан облысындағы меншікті тілшісі қызметін ойдағыдай атқарып келеді. Атап өту қажет, Жақсыбай Самрат - Есіл ауданы Тауағаш ауылының тумасы. Ол өзінің алғашқы мақалалары мен әңгімелерін "Ленин туы", "Ұлан", "Жас алаш", "Азат", "Ана тілі", "Қазақ әдебиеті" газеттерінде жариялаған.
