Оқу ордамызда «Сәбит Мұқанов: тұлға және мұра» атты халықаралық ғылыми-тәжірибелік онлайн- конференция ұйымдастырылды.
Шараны ғылым және инновациялар жөніндегі проректор Ақмарал Ыбыраева ашты. Жиынға Түркия, Өзбекістан, Қазақстанның Нұр-Сұлтан, Алматы, Көкшетау ЖОО-ның ғалымдары және оқу ордамыздың оқытушылары қатысты. Ғалымдар жазушы, драматург С.Мұқанов туралы өз баяндамаларын оқып, оны талқылады. Сәбит Мұқановтың 120 жылдығына арналған конференцияға арнайы шақыртылған қонақтар жазушының еңбектерін жан-жақты талқылап, оны зерттеу барысында кездесетін мәселелерді ортаға салды.
Сәбит Мұқанов СҚО Жамбыл ауданына қарасты Жаманшұбар ауылында дүниеге келген. Бала күнінен ертегі, жыр-дастан, әңгіме-қиссаға құмар болады. Әдебиетке назары ауған ол Абайдың шығармаларымен сусындап өседі. Қаламгердің елдегі нәубет жылдарды бейнелеген көлемді туындысының бірі «Ботагөз» романы. Жазушы бұл туындысында қазақ халқының төңкерістік ірі кезеңдерін қамтыған. Тарихи шығарма бірқатар шетел тілдерінде аударылған. «Ботагөз» романына негізделіп пьеса жазылып, ел театрларының сахнасында сан мәрте сахналанған. Арнайы роман желісінде кинофильм де түсірілді. Сондай-ақ, Сәбит Мұқанов ойшыл-ғалым Шоқан Уәлиханов жайлы да көп зерттеп, қалам тербеген. Жазушы Шоқанның саналы ғұмыры жайлы "Шоқан Уәлиханов" пьесасы мен "Жарқын жұлдыздар" атты еңбектерін жазды.
Қатысушылардың айтуынша, мұндай шаралар жастардың ғылымға деген қызығышулығын танытып, олардың жан-жақты зерттеушілік қабілеттерін дамытады.
