Мемлекеттік органдар мен ұлттық компаниялар өкілдерінің, сондай-ақ Ресей, АҚШ, Израиль, Украина және Өзбекстан сарапшыларының қатысуымен Қазақстанда комплаенсті дамыту және ілгерілету бойынша халықаралық онлайн-форум өтті. Оған университетіміздің бас комплаенс академ офицері Инна Джемалединова қатысты. Іс-шара Сыбайлас жемқорлыққа қарсы іс-қимыл агенттігімен KPMG компаниясымен, «KazBar» заң консультанттар палатасымен және «Құқықтық саясатты зерттеу орталығы» қоғамдық қорымен бірлесіп ұйымдастырылды.
Агенттік Төрағасының орынбасары Олжас Бектенов іс-шараны аша отырып, Қазақстанда сыбайлас жемқорлыққа қарсы іс-қимыл жүйесін нығайту мақсатында мемлекеттің, азаматтық қоғам мен бизнестің күш-жігерін біріктірудің маңыздылығын атап өтті.
О.Бектеновтың айтуы бойынша, «Сыбайлас жемқорлыққа қарсы іс-қимыл туралы» Заңға квазимемлекеттік сектор ұйымдарында корпоративтік парасаттылық стандарттарын сақтауға жауапты сыбайлас жемқорлыққа қарсы комплаенс-қызметтер институты енгізілді.
Парламент Мәжілісінің депутаты Гүлнар Бижанова өз сөзінде компания басшыларының комплаенс қызметтерінің тиімді жұмыс істеу қажеттігін түсінуінің маңыздылығын атап өтті. Өз кезегінде, «KazBar» заң консультанттары палатасының төрағасы Жұмагелді Елубаев комплаенс қызметтерінің кәсіби этика мен бизнестің іскерлік парасаттылығын қамтамасыз ету секілді бірінші кезектегі міндеттеріне назар аударды.
Іс-шара барысында халықаралық сарапшылар қатысушыларға комплаенсті ілгерілетудің және жеке сектордағы сыбайлас жемқорлыққа қарсы іс-қимылды күшейтудің өзекті мәселелері бойынша өздерінің көзқарастарын жеткізді. Іс-шараның нәтижесінде халықаралық сарапшылармен озық тәжірибе алмасу және комплаенсті одан әрі жетілдіру бойынша заңнамалық бастамалар әзірлеу туралы уағдаластыққа қол жеткізілді.
