Біз студенттеріміздің жетістіктерін мақтан тұтамыз және әр жолы олар бағындырған жаңа биік-белестері жайлы қуана хабарлаймыз.
Бұл жолы "FinStars" командасын "Қаржы" мамандығы бойынша студенттерін ХІІ Республикалық пәндік олимпиададағы жеңісімен құттықтаймыз. Ол онлайн режимде Нархоз университетінің (Алматы қ.) базасында ZOOM платформасында өтіп, "Болашақ қаржысы: сын-қатерлер мен ұлттық экономиканы дамытудың жаңа мүмкіндіктері" тақырыбына арналды.
Іс-шара Ұлттық экономика және басқару саласындағы болашақ мамандардың түрлі қызмет салаларындағы шығармашылық әлеуетін ашу, экономикалық кәсіптердің беделін арттыру, студенттік жастардың шығармашылық бастамасы мен ғылыми белсенділігін ынталандыру үшін өткізілді.
Олимпиада жыл сайын 2 кезеңде қазақ, орыс және ағылшын тілдерінде экономикалық бағыттағы күндізгі оқу нысанындағы 3-4 курс студенттері үшін өткізіледі. Сайыста бір командада 3 адам бақ сынасады.
Қатысушылар үш кезеңде жарысты: біріншісі - "Finance – my love... Finance – my life... Finance – my way..." тақырыбындағы бейне-роликтер конкурсы бойынша өтті. Екінші кезеңде олар өздерінің ғылыми жобаларын таныстырып, әрі қарай мамандық пәндері бойынша блиц-викторинадан өтті.
Барлығы ҚР ЖОО 10-ға жуық команда қатысты. Біздің студенттер 1 орынды қанжығаларына байлады. Жеңімпаздардың есімдері: Асылхан Әміржан, Валерия Салихова, Алина Жалтұрова. Біз білімгерлерді құттықтап,оларға жаңа жеңістер тілейміз!
