Қазақ халқының тарихында Алтын Орда орта ғасырларда едәуір жылдар бойы Еуразия халықтарының өмірінде аса маңызды орын алған және тарихи даму үдерісінде ерекше аталатын мемлекеттердің бірі. Алтын Орда тарихын зерттеу тақырыбы бүгінгі күні де өзектілігін жоғалтқан жоқ. Осыған орай Қозыбаев университетінде «Алтын Орда тарихын зерттеу мәселелері: тарихи дереккөздерді анықтау және түсіндіру» атты конференция өтті.
Университет базасында өткен халықаралық ғылыми-тәжірибелік конференцияны «Алтын Орда мен Алтын Ордадан кейінгі мемлекеттердің хан жарлықтары мен хаттарын іздеу (эвристика) және сыныптау» атты Қазақстан Республикасынын ғылым және білім Министрлігінің Ғылым комитетінің гранттық жобасы аясында «Рухани жаңғыру» ӘГЗИ ұйымдастырып отыр.
Жиынға Қазақстан, Ресей, Түркияның түрлі ғылыми зерттеу институттарынан танымал және жас ғалымдары қатысты. Сонымен қатар, ҚР ҰА академигі, Халықаралық қыпшақтану Институтының директоры Көмеков Б.Е., ҚР ҰА корреспондент-мүшесі, Тарихи материалдарды зерттеу бойынша Республикалық ақпараттық орталықтын директоры Әбусеитова М.Х., Түркия Республикасынын Кастамону Университетінің доценті Килдирогли Мехмет, Таулы Алтай университетінің алтаистика және түркология факультетінің деканы және Қозыбаев университетінің оқытушылары ат салысты.
Конференция бағдарламасы үш секция бойынша өткізілді. Біріншісінде қатысушылар ХХІ ғасырдағы Алтын Орда тарихының дереккөздерін анықтап, түсіндірсе, екіншісінде Алтын Орданың мәдени-тарихи мұрасын зерттеудің дәстүрлері мен жаңа тәсілдерін талқылады, үшінші секцияда Алтын Орда тарихының мемлекеттілікті дамытудағы рөлі мен маңызы жайлы сөз етті.
